पोलिसांनी उध्वस्त केली नक्षल्यांची स्मारके
भामरागड : कवंडे येथील नवीन पोलीस स्टेशन उभारणी दरम्यान मिडदापल्ली ते कवंडे रत्यावर पोलीस स्टेशन निर्मितीच्या आधी नक्षल्यानी स्मारके बांधलेली असल्याचे गडचिरोली पोलीस दलाच्या निदर्शनास आले होते. सामान्य नागरिकांच्या मनात दहशत निर्माण करण्यासाठी आणि परिसरात आपल्या अस्तित्वाची जाणीव करुन देण्यासाठी नक्षलवाद्यांकडून सदर स्मारकांची निर्मिती करण्यात आली होती. वरिष्ठ पोलीस अधिकाऱ्यांच्या मार्गदर्शनाखाली गडचिरोली पोलीस दलाच्या बिडीडीएस व विशेष अभियान पथकाच्या पथकातील जवानांनी परिसरात शोध अभियान राबविले. यादरम्यान मिडदापल्ली ते कवंडे रत्यावर तसेच पो. स्टे. कवंडेच्या शेजारील परिसरात 04 स्मारके नक्षलवाद्यांनी बांधलेली असल्याचे दिसून आले. सदर नक्षलवादी स्मारकांची व परिसराची बिडीडीएस पथकाने कसून तपासणी केली. व विशेष अभियान पथकातील जवानांनी माओवाद्यांनी बांधलेली सर्व स्मारके उध्वस्त केली. नक्षलवाद्यांचे आश्रयस्थान समजल्या जाणाऱ्या अतिदुर्गम भागांमध्ये पो.म.केंन्द्र पेनगुंडा, पो.स्टे. नेलगुंडा, कवंडेची स्थापना करून तसेच नक्षलवाद्यांची स्मारके उध्वस्त करून गडचिरोली पोलीस दलाने परिसरातील नागरिकांमध्ये सुरक्षिततेची भावना निर्माण केली आहेे.
पोलीस अधीक्षक नीलोत्पल, अपर पोलीस अधीक्षक (अभियान) यतिश देशमुख, अपर पोलीस अधीक्षक (प्रशासन) एम. रमेश व अपर पोलीस अधीक्षक (अहेरी) एम. व्हि. सत्यसाई कार्तिक, पोलीस उप-अधीक्षक (अभियान) विशाल नागरगोेजे व उपविभागीय पोलीस अधिकारी भामरागड अमर मोहिते यांच्या मार्गदर्शनाखाली पार स्मारके उध्वस्त करण्यात आली. यावेळी पोलीस अधीक्षक निलोत्पल यांनी सांगितले की, “या भागात नक्षल विरोधी अभियान तीव्र केले असून, नक्षलवाद्यांच्या प्रत्येक हालचालीवर लक्ष केंद्रित केले जात आहे.” यासोबतच “ नक्षलवाद्यांच्या स्मारकाला समाजात कुठेच स्थान नसून कोणीही अशा बेकायदेशीर बांधकामांमध्ये सहभागी होऊ नये” असे आवाहन केले आहे.
